News

Realestate News

విశాఖలో.. ‘విరాట్‌’పర్వం!

విశాఖలో.. ‘విరాట్‌’పర్వం!
500 ఎకరాల్లో మెగా టూరిజం ప్రాజెక్టుకు సన్నాహాలు
ఐఎన్‌ఎస్‌ విరాట్‌తోసహా ఇతర పర్యాటక సొబగులు
మూలకుద్దు ప్రాంతం అనువైనదిగా గుర్తింపు
ఈనాడు, విశాఖపట్నం: భీమిలి మండలంలోని మూలకుద్దు ప్రాంతంలో ఐఎన్‌ఎస్‌ విరాట్‌ కొలువుదీరనుందా..? అంటే అవుననే అంటున్నారు పర్యాటకశాఖ అధికారులు. భారత నావికాదళ సేవల నుంచి నిష్క్రమించిన ఐఎన్‌ఎస్‌ విరాట్‌ యుద్ధనౌకను విశాఖ రప్పించేందుకు గట్టి ప్రయత్నాలు జరుగుతున్న నేపథ్యంలో.. విరాట్‌ ఏర్పాటుకు అనువైన ప్రాంతాన్ని ఇప్పటికే గుర్తించారు. దిల్లీలో కేంద్ర సాంస్కృతిక, పర్యాటక మంత్రిత్వ శాఖ ఉన్నతాధికారులతో ఈనెల 13న నిర్వహించిన సమావేశంలో దృశ్యరూపికలో విశాఖ పర్యాటకానికి ఉన్న ప్రాధాన్యం వివరించారు. విశాఖలో విరాట్‌ను ఏర్పాటు చెయ్యాల్సిన ఆవశ్యకతను పర్యాటక శాఖ రాష్ట్ర కార్యదర్శి శ్రీకాంత్‌, ప్రాంతీయ సంచాలకులు ఆర్‌.శ్రీరాములు నాయుడు తదితరుల బృందం కేంద్ర సాంస్కృతిక, పర్యాటక మంత్రిత్వ శాఖకు వివరించింది. ఈ దృశ్యరూపిక (పవర్‌ పాయింట్‌ ప్రెజెంటేషన్‌)పై సంతృప్తి వ్యక్తంచేసిన అధికారులు వీలైనంత త్వరగా సమగ్ర పథక నివేదిక (డీపీఆర్‌) అందజేయాలని సూచించారు.

విరాట్‌ కోసం.. నిధుల వేట!
ఐఎన్‌ఎస్‌ విరాట్‌ విమాన వాహక యుద్ధ నౌకను లంగరువేసి విశాఖ తీసుకురావడానికే రూ. 300 కోట్లు వరకు ఖర్చవుతుందని అంచనా వేస్తున్నారు. ఈ నిధులు ఎక్కడెక్కడ నుంచి సమకూర్చాలన్న దానిపై ఇప్పటికే స్పష్టతకు వచ్చిన అధికారులు పర్యాటక మంత్రిత్వ శాఖతోపాటు నౌకాయాన, ఆర్థిక మంత్రిత్వ శాఖలకు నిధుల కోసం రాష్ట్రం తరఫున ప్రతిపాదనలు పంపడానికి రంగం సిద్ధంచేస్తున్నారు. ఒక్క విరాట్‌ను ఏర్పాటుచేస్తే సరిపోదని.. దీనికి అనుగుణంగా ఇతర పర్యాటక హంగులతో మెగా టూరిజం ప్రాజెక్టుగా మారిస్తే పర్యాటకులను మరింతగా ఆకట్టుకునే వీలుందని భావిస్తున్నారు. జిల్లాకు పర్యాటకుల తాకిడి ఏటా పెరుగుతూనే ఉంది. గతేడాది జిల్లాలోని పర్యాటక ప్రాంతాలను స్వదేశీ పర్యాటకులు 1.80 కోట్ల మంది సందర్శిస్తే.. విదేశీ పర్యాటకులు 78,266 మంది సందర్శించారు. విశాఖలో పర్యాటకాభివృద్ధికి మంచి అవకాశాలున్న నేపథ్యంలో విరాట్‌ కింద ఎంత వెచ్చించినా ఫర్యాలేదనే భావన అధికారుల్లో వ్యక్తమవుతోంది. భారీ ప్రాజెక్టుకు పూర్తిస్థాయి నిధులు సమకూర్చే పరిస్థితిలో రాష్ట్రప్రభుత్వం లేకపోవడంతో కేంద్రంపైనే ఆశలన్నీ పెట్టుకున్నారు. విరాట్‌ ఏర్పాటుకు గోవా, మహారాష్ట్ర పర్యాటక శాఖలు పోటీపడుతుండడంతో ఈ భారీ ప్రాజెక్టు ఎవరివైపు మొగ్గుచూపుతుందో వేచిచూడాల్సిందే.

భీమిలి తీరంలో..
ప్రతిష్ఠాత్మక విరాట్‌ కొలువుదీరాలంటే 18 ఎకరాల స్థలం కావాలి.. ఈ యుద్ధనౌకతోపాటు పర్యాటకంగా వసతులు ఇతర హంగులు కల్పించే దిశగా పర్యాటక శాఖ ప్రణాళికలు సిద్ధం చేస్తోంది. ఇందుకు భీమిలి మండలంలోని మూలకుద్దు ప్రాంతంలో 500 ఎకరాల స్థలం అనువైన ప్రాంతంగా గుర్తించారు. ప్రభుత్వ భూమి కొంత ఉంటే.. మరికొంత భూమి సేకరించాల్సి ఉంటుంది.. రెండు నెలల్లో ఈ మెగా ప్రాజెక్టు పూర్తిస్థాయి రూపంతో పర్యాటక శాఖ మరోమారు కేంద్ర పర్యాటక మంత్రిత్వ శాఖ ముందుకు వెళ్లనున్నట్లు సమాచారం.


Notice: compact(): Undefined variable: limits in /home/manohars/public_html/vizagrealestate.com/wp-includes/class-wp-comment-query.php on line 821

Notice: compact(): Undefined variable: groupby in /home/manohars/public_html/vizagrealestate.com/wp-includes/class-wp-comment-query.php on line 821

Warning: count(): Parameter must be an array or an object that implements Countable in /home/manohars/public_html/vizagrealestate.com/wp-includes/class-wp-comment-query.php on line 399

 

Free!

Services

Promotion

SMM

Posting

 

           Be the first to know about Free Service Offers

VRE Logo