News

Realestate News

ముడసర్లోవకు రూ. 23 కోట్లు

ముడసర్లోవకు రూ. 23 కోట్లు
న్యూస్‌టుడే, కార్పొరేషన్‌
మహా విశాఖ నగరపాలక సంస్థ పరిధిలోని ముడసర్లోవ జలాశయం, దాని పరిసర ప్రాంతాల అభివృద్ధికి జీవీఎంసీ రూ. 23 కోట్లు కేటాయించింది. వీటిని ఆసియా అభివృద్ధి బ్యాంకు(ఏడీబీ) ద్వారా సమకూర్చుకోవాలని నిర్ణయించింది. మంగళ, బుధవారాల్లో ఏడీబీ ప్రతినిధులు ముడసర్లోవ పరిసర ప్రాంతాల్లో పర్యటించారు. అనంతరం నిధుల మంజూరు చేయడానికి వారు అంగీకరించడంతోపాటు, తదుపరి చర్యలు తీసుకుంటున్నారు. ముడసర్లోవ పార్కు అభివృద్ధికి ఇప్పటికే వుడా ప్రణాళికలు సిద్ధం చేస్తుండగా, ఉద్యానవనానికి ఆనుకుని ఉన్న ప్రాంతంతోపాటు, జలాశయాన్ని పునర్‌వ్యవస్థీకరించనున్నారు. జీవీఎంసీ శీఘ్ర బస్సు రవాణా వ్యవస్థ (బీఆర్‌టీఎస్‌) నిర్మాణం తరువాత ముడసర్లోవ జలాశయంతోపాటు, పరిసర ప్రాంతాలను పూర్తిగా పట్టించుకోవడం మానేశారు. ఇదే అవకాశంగా భవన నిర్మాణదారులు వ్యర్థాలను జలాశయం చుట్టుపక్కల వేస్తున్నారు. దీని వల్ల భవిష్యత్తులో పరివాహక ప్రాంతం నుంచి నీరు రాకుండా నిలిచిపోయే ప్రమాదముందని గ్రహించిన అధికారులు ఇటీవలే భారీ వాహనాలు వెళ్లకుండా ప్రవేశమార్గాల వద్ద అడ్డంగా ఇనుప కడ్డీలను అమర్చారు. ఒకప్పుడు అత్యంత సుందరంగా ఉన్న ఈ ప్రాంతానికి పూర్వవైభవం తీసుకురావాలనే ఉద్దేశంతో ఇటీవల రూ. 1.50 కోట్లు వెచ్చించి పిచ్చి మొక్కలు, తుప్పలను పూర్తిగా తొలగించారు. బుధవారం జీవీఎంసీ ప్రధాన ఇంజినీరు దుర్గాప్రసాద్‌, పర్యవేక్షక ఇంజినీర్లు వెంకటేశ్వరరావు, ఆనందరావులతో కలిసి ఏడీబీ ప్రతినిధులు ముడసర్లోవలో పర్యటించారు.

అభివృద్ధి ఇలా…
ముడసర్లోవ పార్కు చుట్టుపక్కలా 550 ఎకరాల్లో మొక్కలను నాటడం. వాటి సంరక్షణ చర్యలు.
ప్రస్తుతం ఉన్న జలాశయానికి పరివాహక ప్రాంతం నుంచి నీరు చేరేలా చర్యలు. పూడిక తొలగింపు.
జలాశయాన్ని ఆనుకుని ఉన్న 850 ఎకరాల ప్రభుత్వ స్థలం అన్యాక్రాంతం కాకుండా పటిష్ట చర్యలు. ఉన్న ఆక్రమణలను గుర్తించి, వాటిని తొలగించి, స్వాధీనం చేసుకోవడానికి చర్యలు.

ముడసర్లోవ పరిసరాల అభివృద్ధికి చర్యలు…
ముడసర్లోవ రిజర్వాయర్‌ పరిసరాలను అభివృద్ధికి చర్యలు తీసుకుంటున్నాం. రూ.23 కోట్ల ఏడీబీ నిధులను అభివృద్ధి కార్యక్రమాలకు వెచ్చించనున్నాం. పార్కు పరిసరాలతోపాటు, రిజర్వాయర్‌ను అభివృద్ధి చేయడానికి చర్యలు చేపడుతున్నాం. ప్రాజెక్టుకు సంబంధించి సవివర పథక నివేదిక(డీపీఆర్‌)ను తయారు చేయాలని ఇంజినీర్లను ఆదేశాలిచ్చాం. తర్వాత టెండర్లు ఆహ్వానిస్తాం.

– దుర్గాప్రసాద్‌, జీవీఎంసీ ప్రధాన ఇంజినీరు